Dat is een Gericht, dor kann ik op af. Gifft jo Lü, de meen, dat kiekt rinn as rut ut. Stimmt nich. Is man so, dat een nich so veel met sien Teihn moken mutt. Un kanns dorum mehr freten as wenn Du ierst all´ns met ´n Meß snieden mutts. Wat is Labskaus? Dat is ´n ool Gericht vun See. Alln´s wat Du bruuks, hollt sick good över Weeken. Un wen Du seekrank warrs, denn hess tominns nich umsönst kaut. Un ok uns Nahwers in Denmark un Sweden kennt dat. So is dat just ´n Stück internatschonaal Keuk.
Wat bruuks för Labskaus? För veer Lüü
Woans geiht dat?
1 Kilo Kantüffeln. De warrd stampt. Kanns ok Kantüffelmus nehm.
1 Pund Pökelfleesch (kanns ok Corned Beef nehm. Un ok dat Dosenfleesch vun de EG, wat vun den Rindfleeschbarg kummt).
1 Zibbel
Öl
Suur inleggt Gurken. Könt ok seutsuur Gurken sien
Rode Beete (inleggt)
Hering: Rullmops, Bismark oder ok de dänschen seuten Hering. Wahrschau: Kümmt jümmers blangenbi un ni nich mittenmang!
4 Eier (de kümmt as Spegeleei baben op)
Dorto: Beer un Kööm
Kantüffeln schälen un koken, bit se week sünd.
Gurken un Rode Bete in ütte Stücken sneden. Man nich all´ns, mutt noch wat för de Dekoratschoon blieven.
Fleesch to Mus drücken
De Zibbeln in lütte Stücken sneden
Kantüffeln rutholen un to Mus stampen.
Öl in ´n grote Pann oder ´n groten Pott. Denn op´t Füer doon un heet moken
Zibbeln in de Pann un glasig warrn loten
Fleesch in de Pann un anbroten
Dat Füer lütt stelln.
Gurken un Rode Beete (nich allns) in den Pott met Zibbeln un Fleesch.
Kantüffelmus dorto
Warm holln un af un an dörröhrn. Nu hess Labskaus in´n Pott.
Spegeleier moken (in de Pann).
Labskaus op de Deller dohn. Nu hess´n Labskausbarg.
1-2 Gurken un Rode Beete blangenbi leggen.
de Hering kümmt half blangenbi un half op den Labskausbarg.
